உயிர்த்திருக்கிறேன்
உன் நினைவுகள் சுமந்து - இந்த
ஊருணி வீட்டில்!
எரிக்கப்படாத - உன்
இறந்தகாலம்
எரித்துக்கொண்டிருக்கிறது
என்
எதிர்காலத்தை
பங்கு வைக்கப்பட்ட - உன்
பாசம்
பரிகாசம் செய்கிறதென்னை
காரணமும் இன்றி
காதலும் இன்றி - ஓர்
கற்பனா உறவில்
காலம் கழிக்கின்றேன்
நேசிக்கப்படாத - என்
நேசமும்
யோசிக்கப்படாத - என்
யோகமுமாய்..
வெறுமையில்
வழுக்குகிறது - என்
வாழ்க்கை
என்றேனும் - உனக்குள்
எனக்காகவும் ஓர்
எச்சம் உருவாகும்
எனும்
எதிர்பார்ப்புக்களுடனும்
ஏமாற்றங்களுடனும்
இப்படியாக
இன்னமும்
இறந்துவிடாதிருக்கிறேன்
இறந்த கால இனிய நினைவுகள் மட்டுமே
இறுக்கிப்பிடித்தபடி!
No comments:
Post a Comment